布沙囝囝「倒戈」羅斯輸到喊

昨日NBA爆發上屆東岸決賽翻版戰，主場出擊的熱火以97:93勇挫公牛，不過場外兩單(火羅)事卻成為焦點。布沙囝囝於觀眾席為熱火打氣斷正已經夠尷尬，豈料孭鑊的戴歷羅斯更被踢爆輸到喊，今鋪公牛雙星可謂輸波又輸面！

去屆常規賽MVP羅斯雖貢獻34分，但卻在完場前22秒兩罰全炒錯過反先良機，比賽末段更射失絕殺球，連累公牛以4分之差輸波。賽後有記者殺入更衣室，發現「牛魔王」雙眼通紅，聲淚俱下將輸波責任攬上身。公牛大前鋒布沙就比羅斯更(火羅)，其兒子昨仗在觀眾席為熱火打氣，不斷高呼「Let's Go Heat！」口號，過程全被電視台拍到。

高比成湖人史上命中最多球員

公牛無「飛士」，為熱火攻入35分的勒邦占士就勁風騷嘞，由於邁阿密昨日舉行年度馬拉松比賽，6,000名參賽選手令美航場館外水洩不通，「大帝」於是踩單車到場應戰，賽後更表示：「唔知出面塞完未呢？咁高興不如今晚留喺球場過夜，聽朝直接參加操練！」

同日高比拜仁獨取35分，率領湖人作客106:101擊敗木狼之餘，更以9,946球超越名宿渣巴，成為湖人史上命中投射最多球員，明早主場對山貓有望乘勝追擊，讓4.5分要上盤。