「Katie」潘曉彤靠欖保童顏

如果命運能選擇……因為一齣《天與地》,令飾演黃德斌角色Ronnie 15歲女兒Katie的潘曉彤(Rachel),廣受宅男注視,原來她已是一位23歲的大學畢業生。這名「童顏甜姐兒」大爆她的「防腐」方法竟是靠打欖球來Keep Fit,想重拾「年少多好」感覺的你,以下內容絕對不能錯過!

潘曉彤中學就讀澳洲國際學校時,已是投球及籃球校隊成員。升讀城市大學後,更加入了欖球隊:「其實打欖球都幾型,感覺好『潮』,特別係我打傳接鋒,成日要動腦筋點樣同隊友配合,比起單憑『牛力』嘅運動,欖球好玩好多!」

做運動有講有笑保青春

雖然本身有運動根底,但回憶初學階段,Rachel話仍然雞手鴨腳:「記得當時係4年前我升讀大學二年級嘅時候,需知欖球唔係圓嘅,落地後根本預計唔到會彈去邊。比起較『聽話』嘅籃球,成日失控嘅欖球唔知令我出醜咗幾多次,不過最後都被我馴服!」

雖然年紀已經2字頭,但在《天與地》扮演15歲的Katie仍入型入格,Rachel坦言全靠運動來「防腐」:「好多人喺戲度見我彈琴,就以為我靠『安靜』嚟養顏,其實啱啱相反,我覺得要做運動先可以保持青春,除咗欖球,我仲有打泰拳。再講,打欖球係團體運動,同班隊友有講有笑,心境自然可以Keep住後生啦!」

安全過陳豪打拳

欖球屬於衝撞性運動,問到有否驚撞破相影響出鏡,Rachel坦言「未驚過」,還說笑比陳豪更安全:「唔好成日被電視上一啲衝撞攔截嚇親,因為欖球總會規定初學者要上『安全堂』,教點樣撞得安全。打咗咁多年我都未試過破相,相比起劇中陳豪因打拳成日口腫面腫,已經安全好多啦!」

Binlo子文

潘曉彤原來係欖球粉絲,仲着打氣Tee為港隊打氣。

如果命運能選擇……「防腐」有辦法