韋迪風騷高比無癮

雙俠同人唔同命！熱火及湖人兩大NBA爭標熱門昨日分途出擊，「閃電俠」韋迪率領熱火大炒山貓39分賀新季首度出糧之餘，職業生涯得分及助攻數字均達新里程碑；另邊廂「小飛俠」高比拜仁雖成為最年輕28,000分先生，但卻化身「黑洞球員」連累湖人作客以90:99不敵金塊，勁掃興！

長達149日的停擺告一段落，NBA球員終於在前日獲得新季第一份波糧，熱火昨日鬥山貓賽前，一眾球員均歡天喜地，大前鋒保殊表示：「就算唔係現兜兜有Cash喺手，去網上銀行Check吓個戶口都覺得好興奮。」

停擺後第一次出糧

望穿秋水終於有糧出，熱火昨仗打得特別醒神，即使勒邦占士攻入今季新低16分，球隊依然以129:90屠宰山貓，錄得創會以來首次開季5連勝。贏波功臣韋迪全場貢獻22分及6次助攻，成為第25位得分超過14,000分的現役球員之餘，職業生涯累積助攻次數亦突破3,500次大關，搶盡「準老襯」占士風頭。

反觀另一風頭躉高比拜仁則黯然神傷，「小飛俠」昨日28射6中僅得21.4%命中率，比賽末段更漠視隊友頻頻爭波射再現「黑洞球員」本色，即使全場攻入16分的高比以33歲131日之齡成為史上最年輕28,000分先生，奈何卻孭鑊累湖人以9分之差不敵金塊。

湖人搵火箭出氣

「紫金兵團」雖然失威，但雙塔加素及拜林明顯漸入佳境，前者時隔286日再貢獻「20+10」數據，「小鯊魚」刑滿復出後亦打出身價，明早回師主場小讓火箭4.5分可望迅速反彈贏波開上盤。