ELKE運動細胞爆燈

o靚模組合冬甩成員出名性感，火辣比基尼寫真簡直係宅男恩物，不過新成員陳芷敏（ELKE）賣清純，咪睇佢外表斯文、對運動就好Open，最叻跳舞、打羽毛球，今次受訪第一次踢波更展現驚人體育細胞，學成「推右走左」甚至有漫畫「直角假身」味道，即使之前唔知比利同球王係乜水，但一聽完就可以好詳盡咁喺鏡頭前講番出嚟，認真叻女！

現年21歲嘅ELKE青春無限，學習能力勁高，初次踢波冇耐已經開始「上腳」，推右走左好快就學識。呢招除咗要識把握時機，仲要動作靈活，同埋速度夠快，好在ELKE玩開運動難唔到佢，鏡頭前佢仲整埋V字手勢，個樣甜得嚟又有活力，唔搵佢做寶貝推銷本地波，真係嘥晒。

踢波有品最得人歡心

ELKE踢波有姿勢，平時有冇睇開波先？「其實我唔係成日睇波，世界盃時屋企人睇，我又學吓睇，但唔係好有心裝載囉！」冇心睇比賽掛住睇靚仔？「哈哈，我唔係好鍾意靚仔o架咋，特別憎啲自以為好型嘅男仔，我覺得最緊要品格好囉，如果球場上茅，私底下又沙沙滾，個樣幾靚都冇用啦，係咪先！」

比利球王事迹聽1次入腦

估唔到ELKE人仔細細，對個世情睇得咁通透，值得畀10個like。踢完波，ELKE接受挑戰試做主播，雖然佢年紀輕唔知兩大球王馬納當拿同比利係乜水，但經小記稍為解釋後，ELKE即刻入晒腦，仲喺鏡頭前將佢哋兩個嘅恩怨講得頭頭是道，加上外形勁有觀眾緣，有潛質做新一代新聞小花，又或者索女主播。