今年24歲嘅江卓儀，唔經唔覺打咗沙排已經8年，雖然佢好鍾意打波，仲代表過香港參加亞運等大賽，但就承認打波搵唔到食，都要為前途打算，所以理大護理系畢業之後，會做全職護士，並繼續喺公餘時間打波。
除此之外，佢亦作出多方面嘗試，包括擔任排球評述員及主持，早前佢講世界女排大獎賽好評如潮，小記都係佢Fans之一。下個月佢仲會為now擔任世界盃女子排球賽嘅評述，賽事於11月4至18日喺日本舉行，鍾意排球同Sonia嘅朋友唔好錯過喇！