沙排嬌娃江卓儀 射窩利似足偶像巴迪高

周日嘅《Free啲劇院》每期都會搵靚女嘉賓接受我哋嘅球技大挑戰，當中最好波，睇怕唔使測試，肯定係今期嘉賓江卓儀。身為港隊沙排女將代表，Sonia運動天分當然唔簡單，原來佢唔止玩老本行排球（Volleyball）夠叻，就連踢足球射窩利（Volley）都一樣掂，仲似足佢偶像「戰神」P:巴迪斯圖達添！

足排同樣講時間掌握

打排球最講身體配合同掌握時間，呢兩大條件就算用喺足球，其實亦都相通，所以話要用足球考起Sonia？真係一啲都唔易！就好似我哋今次要佢做嘅窩利抽射，講得簡單直接，即係唔好畀個波落地，掌握好時間，將佢凌空大腳抽射去指定目標，呢項技巧幾乎就同排球如出一轍，都係趁個排球嚟到，掌握最好Timing將佢凌空打去指定方向同位置。

「効力費倫多年好波又忠心」

雖然Sonia早前打排球受傷，受訪當日都要紮住上陣，但佢即席示範嘅窩利抽射，可以話係腳腳七注，力度同準繩度兼備，話佢係女足代表都隨時有人信呀！問番Sonia點解咁勁揪？佢話係多得平時成日睇佢偶像巴迪斯圖達嘅比賽片段，偷師學番嚟個喎。

以「巴迪高」做偶像，就知Sonia係識波之人。Sonia話：「我欣賞巴迪斯圖達除咗因為佢好波之外，仲因為佢夠忠心，好似佢踢咗費倫天拿咁多年，未必個個球星都做得到o架！」隨口都噏得出「巴迪高」嘅料，Sonia絕對係個超級球迷喎！