基仔似喇英想做金剛 阿成誓圓2016奧運夢

港欖隊有個叫范信基的球員大家未必記得，不過每提起「菠蘿頭嗰個呢」，相信各位定必記起這位Icon人物。對於標誌性髮型，「基仔」大爆自己6年無剪頭髮，就是怕球迷唔認得他。

「6年前見外國有球員咁整我就試吓，點知之後大家都睇我『頭』做人，最緊要係教波班小朋友因為我髮型認得我，咁就無剪過其他髮型，只係每年修少少髮尾。」「基仔」keep住「菠蘿頭」6年，令外界每逢有類似髮型的人出現都被誤認是「基仔」，最近一次是於港產電影《熱浪球愛戰》中，被記者誤認是客串演出的Bro5成員喇英。

基仔6年冇剪髮

「其實你唔係第一個認錯，我自己都覺得好似，但真係唔係我，我之前都試過casting廣告，如有機會我都想試吓做藝人金剛嘅搞笑角色，叫我扮喊就死得啦，最緊要好玩！」

「基仔」又想拍戲又做金剛，相反姚錦成談起將來計劃，始終離不開欖球：「欖球將於2016年首次殺入奧運會，到時我只係27、28歲，仲有機會打，我希望圓奧運夢，但同時呢幾年我們全隊會努力爭取大型賽事冠軍，為欖球殺入精英項目努力。」23歲的他與「基仔」同樣希望為下一代欖球員努力，延續近年港隊位列亞洲強隊的氣勢。