「葉問師妹」至愛舞劍
陳嘉桓成名作係《葉問前傳》，佢飾演嘅係葉問師妹。Rose師承冼國林，係葉問之子葉準嘅徒孫，16歲開始學功夫，到依家差唔多習武3年，Rose最初係學詠春，因為師傅話佢之前冇乜運動底，詠春較適合女仔同初學者，上咗手之後，依家就學緊洪拳及兵器。
Rose話初時學武都幾辛苦，亦曾經受過傷及拗過柴，不過習武之後身體好咗，唔會好似以前咁，企得耐都覺頭暈，身體協調亦好咗，依家直頭愛上運動，除咗會喺屋企練武之外，得閒仲會跑步練氣。
咁多種武術之中，「小師妹」最鍾意係舞劍，因為覺得女仔耍劍好靚，十足十《神雕俠侶》嘅小龍女咁，佢間中都會喺屋企舞劍，屋企隻狗唔知佢做乜，仲會喺度吠佢，諗落都幾搞笑！