糖妹學踢波山Sir都畀Like

邊個話女人唔識波㗎！「宅男女神」糖妹（黃山怡），膽粗粗隻身到車路士足球學校拜師。糖妹人仔細細，踢起波一啲都唔失禮，就連該校主教練山度士「山Sir」都話要畀Like呀！

糖妹本身係車路士球迷，細細個已經成日同男仔踢波，今次直頭踩入車路士足球學校做個「超齡學生妹」！雖然呢間學校收生條件為4至17歲小朋友，但「山Sir」見糖妹咁有Heart，於是就「破格」收佢為徒，親自「一對一」傳授足球秘技。

一小時私家特訓

經過一小時特訓，糖妹完全「升呢」，而佢仲回憶起以往做「小學雞」時嘅足球歲月：「我讀小學時校內有個足球場，好多時都會同成班男同學一齊踢波，但次次都畀人屈做龍門，仲經常食波餅省中臉！勁慘！不過，到咗中學轉到女校就冇再玩，反而改為做球迷睇比賽。」

Crossover宣揚關愛社群訊息

事隔多年再踢波，糖妹一啲都唔失禮，更獲「山Sir」大讚。呢位「超齡學生妹」好滿足咁話：「好開心嚟到呢個藍色、象徵車路士嘅球場踢波，今日『山Sir』教我控球同盤球基本功，令我獲益良多。不過我學起嚟比較心急，加上今次嘅教練係『山Sir』，平日好少機會得到佢指點，當然想盡快喺佢身上抽多啲足球精華啦！」

除咗學踢波，糖妹發現車路士足球學校另一宗旨「關愛社群」最值得「Like」！她就話：「呢間學校經常組織學員變『小義工』去推動慈善，藉以培育對社區歸屬感之外，亦知道佢哋經常舉辦一啲免費班畀低收入人士，我決定要自己細佬嚟呢度報名。另外，之後『糖兄妹』都會有好多公益同環保活動，以宣傳正面訊息，我就想睇吓可唔可以嚟個Crossover，或者作番首歌畀佢哋，將正能量帶畀年輕人。」

問乜都識！

識踢波都唔代表對足球有認識嘅，但糖妹就用實力證明自己係個百分百「車仔Fans」！我哋準備咗10條問題考考佢，結果Kandy唔使5分鐘就答晒，仲要10題全中，真係叻爆！