127蚊踩入溫布萊捧盃
直闖「三獅兵」更衣室，踩入溫布萊球員通道，再捧埋足總盃，真係諗起都興奮！只要付出10鎊，即係127蚊港幣，你都可以做齊3樣嘢！
上周日小記參加咗個溫布萊觀光團，發現更衣室掛起嘅球星波衫竟然連價錢牌都未剪；由球員通道步出球場呢幾步路，基於保安理由講到明唔畀遊客拍片；至於個足總盃就梗係畀隻假嘅你捧啦，期間唔準影相，因為佢哋有官方攝影師在場準備掠你一筆，唔忿氣？舊幾水玩盡溫布萊喎，仲想點呀？
不得不提嘅係溫布萊除咗擁有全英球場最大嘅餐廳，場內包廂座位嘅玻璃仲係傾斜5度，設計師又喺山頂位置加設屏風玻璃，小記大叫「好波！」，果然做到超強嘅迴音效果，你話如果9萬球迷同一時間吶喊係幾咁得人驚。
一眾遊客排隊踩入溫布萊。