倫敦周街都見到朗尼

生髮成功，上周六仲入埋波幫曼聯全取3分，朗尼新季簡直攞晒頭彩。雖則「魔童」上季因為嫖妓搞到一鑊粥，但跟住車路士足球學校嚟到倫敦幾日，發覺無論大、小型體育用品店、老翻波衫舖甚至位處溫布萊嘅卜比摩亞館都有朗尼嘜頭，人氣爆晒燈！

一班車路士足球小將嚟到倫敦，最想就係買番對新波砵，所以大家趁晚飯前嘅空檔紛紛走訪各大體育用品店格價，一係唔行，一行就發覺唔對路，點解街頭巷尾都見到朗尼嘅？

「魔童」呢期真係紅到爆，通街嘅老翻波衫舖都掛住佢件波衫，就連溫布萊嘅卜比摩亞館都有朗尼簽名波衫抽獎遊戲玩，不過最誇都係啲體育用品店，NikeTown有佢嘅大型海報同1:1 Figure，Lillywhites仲特設咗個朗尼球衣專區，佢件英格蘭波衫連埋印字都只係做緊11.9鎊（約151港元），向職員查問後得知佢哋淨係印朗尼波衫都印到手軟，幾乎每星期都會畀客仔掃晒成個衣架嘅「魔童」波衫，銷量勁到你唔信。

梅永亮搶購小白砵

朗尼波衫大賣，一班車路士足球小將就大出血，當中形象勁Punk嘅梅永亮就豪使咗超過300鎊（約3,826港元）掃貨，Alex話：「入訓練營之前想買對新砵，恩尼斯達對砵香港都未出，當然要喺度（倫敦）買番對『先着為快』。」車路士足球小將前日正式展開足球訓練營，一班「藍仔」有新砵着，落到場都特別醒神，不過教練梁承傑就話，最好先着對新砵跑番幾日整個鞋形出嚟，如果即刻着嚟踢波，腳板底實起硬水泡。