梁子駿獎牌做聘禮

一次不忠，百次不用？17歲初登甲組時年少不羈又貪玩，加上生相沙塵，令梁子駿出道9年多以來，一直被標籤成「私生活不檢點」和「無紀律」。「無錯，我啱啱踢甲組嗰陣係好貪玩，但已經係差唔多10年前嘅事啦！我起碼4、5年無蒲過喇！」新一季加入晨曦大家庭的「子駿」給力地道：「講多無謂，我會用行動嚟證明一切！」

「其實點解啲人會覺得你私生活唔檢點？成日蒲呢？」面對記者單刀直入，「子駿」這樣回應：「做得出唔怕認，我開始踢甲組嗰陣的確好爛玩，有局必到，但自從落山後已經冇喇。但係好奇怪，無論之後我踢流浪、東方、淦源定飛馬，都硬係有人話我私生活唔檢點，我都好無奈！」「子駿」強調自5年前開始已洗心革面，因為：「自從同『阿婷』拍拖後，我真係生性咗好多。佢事事都支持我，對我好好。」估不到一臉招招積積的他，竟主動披露感情生活。

送婚戒＋最少一面冠軍獎牌

記者本欲問「子駿」今番轉會晨曦，可有得到女友支持，豈料他竟嚷着要改口：「嘻！嘻！我無女朋友啦！依家佢係我未婚妻，我哋將會喺出年6月12號結婚，到時希望除咗結婚戒指之外，仲可以送埋最少一面為晨曦贏嘅冠軍獎牌畀佢。」原來「子駿」早前趁與一班友好赴菲律賓旅行，兼探望在彼邦工作的前淦源隊友李思明期間，得到多名軍師助拳當眾成功求婚。「其實我哋拍咗咁多年拖，都計劃咗出年結婚，只不過我想佢可以有一啲難忘嘅回憶，咪花啲心思囉！講真呀，佢答應嫁畀我一刻，我自己都好感動。」「子駿」希望伺機多謝李思明太太阿Mon，以及前南華隊友梁智駒兩名軍師，全賴兩人的精心安排，才讓他抱得美人歸。

報答教練列卡度知遇之恩

「子駿」坦言成家立室在即，令他充滿動力，期望新季在晨曦建功立業，不欲令未婚妻擔心之餘，也希望報答教練列卡度知遇之恩：「我哋喺飛馬合作咗一季，大家都好清楚對方，佢用人以態行先，話之你係老細個仔，冇態一樣無得踢！係好值得球員尊重嘅教練；佢唔理出邊啲人點講我，都肯向會方要求簽我，我一定唔會令佢失望。」