做生意難過踩車

創業容易守業難！何兆麟坦言One Man Band搞生意難過踩車，深深體會「付出不等於收穫」，幸他用昔日比賽「屢敗屢戰」的精神堅持下去，熬過一個又一個難關，從中還學到好多新事物，放眼世界，努力掙回來的成功感甚至大過贏金牌。

諗噱頭一腳踢

「香港雖然好多人踩單車，但好少人覺得踩車係要學……」「阿麟」點出經營單車公司「唔易做」：「淨係教車唔夠，要諗好多噱頭打開市場，好似組織單車旅行團、單車Matching（交友配對），呢類型活動喺香港都未有人做過，做生意就不停要試，反應有好有壞，亦試過有一年暑期班冇人報名。」

「鬥車都有贏有輸，面對失敗嗰陣會用比賽心態，跌低咗咪企番起身再嚟過囉！」何兆麟續說：「以前做運動員只須專心練習比賽，你只要做好一樣嘢就得，做老細呢？乜都要理，想做得好唔可以犯錯，難好多！不過，一腳踢都有一腳踢嘅好處，呢幾年我學咗好多好多，透過公司運作睇到個世界更大，其實都切合自己樣樣想學吓嘅性格，所以我從來唔後悔當年咁早做退役嘅決定。」