on.cc 東方互動主頁

何兆麟人生交叉點

「我呢個年紀，究竟繼續喺單車圈子？還是跳去另一圈子？」01年全運金牌得主何兆麟，自03年退役後從沒一天離開過單車，教小朋友、搞班、帶隊、諗Event……胸懷大志夢想開辦全港首間單車學院，漸漸望見「終點」之際卻又碰上「轉行」機會，31歲人第一次見工，「阿麟」坦承「有啲心郁」，站在人生交叉點不禁自問：「係咪除咗單車就別無他選？」

開辦單車學院對何兆麟來說不僅是夢想和事業的追求，背後更因兩種使命使然，他希望進一步推廣單車安全，同時為其他退役「單車仔」開創出路。

香港近年單車意外頻生，令何兆麟倍感慨嘆，上月初就一宗導致死亡的炒車事故更於Facebook上寫道：「究竟我還應不應該推動這個運動？」他指出部車愈靚就愈易發生嚴重意外：「以前啲單車幾百蚊，踩得快極有限，炒咗都係損手爛腳，不過依家啲車靚咗好多，閒閒哋幾千蚊一架，速度自然快，出事起上嚟好大鑊。」

去學校搞安全講座

「阿麟」強調太多意外，一來可惜，二來對單車運動帶來負面影響，阻礙發展：「近期去咗好多學校做推廣，又搞安全講座，希望做到『零意外』，作為單車教練，呢樣係最大使命。」

另一樣令何兆麟耿耿於懷的，是單車港將的出路問題：「香港隊有幾多個教練位？連埋機械士，10個好未！根本就僧多粥少，如果出面冇Market，班退役車手根本冇得喺呢個圈繼續生存，如果有間單車學院，起碼畀佢哋多條路行。」

正如何兆麟所言，其單車人生路受幸運之神眷顧總算一帆風順，19歲轉踩全職，僅4、5年已奪不少榮譽，最威是01年全運記分賽摘金，02年夥拍黃金寶奪釜山亞運麥迪遜銅牌，沒料翌年毅然「封轆」：「當時想一邊讀書一邊踩，甚至踩到京奧，可惜沈教練唔畀，我唔甘心齋踩車，都要Plan定將來條路點行，況且好多獎都攞過，好難有突破，如果停留喺度打轉，人生唔圓滿，我唔得！」

由「散教」到開班……

「冇踩港隊後先去讀書，報讀北體大（夜晚Part Time），算係履行對自己嘅承諾，其餘時間想試做教練，將自己所學傳畀下一代，於是自製傳單收生，開始咗教車生涯。」「踩」出名堂對何兆麟告別運動員生涯後「自立門戶」搞生意有幫助，由起初「散教」成人，之後開私人小朋友單車班、教學校，接手滙豐銀行公司內部單車隊……何兆麟期間成立了「必馳單車協會」及開設「精英體育發展有限公司」，教車之餘還參與百萬行、單車籌款顧問等公益活動，可以話「放長線釣大魚」。

向夢想進發？收入冇保障！

「搞咗5年無驚無險，生意發展唔錯，比其他同類型嘅優勝，如果有足夠資金搵專業公關公司做宣傳，Marketing做得好，開設單車學院唔係天方夜譚！」「阿麟」講起夢想就眉飛色舞：「想好似駕駛學校咁有一個單車城，總之諗起踩車就嚟我度！希望2、3年內Achieve到呢個Target。」望到終點未？「見到啲啦！關鍵係睇吓Bid唔Bid到滙豐單車百萬行嚟做， OK的話賺到一筆錢放落Marketing推廣，單車學院就有望！」

31歲見工超正Offer

不過，何兆麟亦明白夢想未實現之前，這盤「一腳踢生意」收入絕不穩定，亦欠保障，也許搵份固定職業比較實際，他早前在機緣巧合下聽了由香港奧委會「運動員就業及教育計劃」主辦的就業講座，並得到一次面試機會。「上個禮拜，人生第一次見工！」「阿麟」透露：「華人置業覺得運動員精神好有價值，所以Offer咗啲職位出嚟，等我哋唔使由好低職位做起，仲有培訓制度，晉升機會亦唔錯，我1st In之後覺得幾吸引，開始諗，我呢個年紀，究竟繼續喺單車圈子？還是跳出另一圈子？其實轉行都係『黃金時期』，假如『華置』嗰邊有個唔錯職位，我都好有興趣去一個完全同單車無關嘅環境工作，接受新挑戰。如果喺陌生行業都做出成績，滿足感一定更大。」何兆麟還說自己適合做Marketing，幫公司搞Event應可發揮所長。

一方面投標搞單車百萬行，一方面見工覓出路，「阿麟」遇到兩個「餐士」，猶如踩到分岔口，但他表明單車學院仍放第一位：「接得成百萬行的話（7月知道結果），我會繼續搞單車，等日後學院上晒軌道，到時轉行做乜都得啦！」何兆麟何去何從，今個月內將有定案！