未雨綢繆　退役從事珠寶鑑證

廣州亞運會不僅為黃蘊瑤帶來傷痛與榮譽，更讓她加快成長，學懂未雨綢繆為退役後鋪路，還做足資料搜集將來報讀「珠寶鑑證」課程，決心闖出另一番事業，事實上，這個專門又冷門的行業跟貪靚Jamie簡直是Perfect match！

榮升母校校董

「單車運動員退役後好多都轉做教練或有關工作，但我不希望自己的人生只得單車，世界好大，應該要學習和挑戰其他新事物吧！」黃蘊瑤簡單幾句話已盡流露「真係大個女」的成熟一面：「以前只要鍾意就『乜都得』，依家凡事都會諗得長遠一點，就像踩車，總不會是終身職業，我也要為日後生計打算！」

向來有主見的Jamie透露已經鎖定目標：「我想從事珠寶鑑證行業，早就搵齊有關課程資料，可惜這個科目未有開設遙距上堂，但我會在網上先讀好英語做準備，更不排除將來跑到美國升學。」由於延遲離港集訓，令小妮子上周五有機會參觀「香港珠寶首飾展覽會」，大開眼界，整天樂透！

Jamie成為珠寶鑑證師言之尚早，但她日前卻榮升做「黃董」，正式簽約擔任保良局王賜豪（田心谷）小學校董：「我要跟學校保持聯絡，定期開會，跟學生分享……能夠回饋母校，我覺得好開心，希望一齊共創未來！」