Roller Derby 野蠻暴力姊妹滾吧！

滾吧！女子兵團！近年「瘋」行歐美嘅Roller Derby（RD）野蠻、狼死、暴力、血腥……淑女統統變Punk妹，着晒漁網絲襪+Deep V背心，忘情喺Roller場內推、撞、扯、衝、打，撻得愈瘀愈興奮，用行動話畀大家聽「女人夠Tough唔好恰」！連荷里活片影星祖娜芭莉摩亞（Drew Barrymore）都睇中「RD」呢份激情，年幾前處女執導開拍電影《Whip it》，鼓勵「姊妹們」追求夢想「滾出精彩人生」！

冇錯，女人野蠻起嚟真係唔講得笑！而且亦係Roller Derby主題。呢項瘋狂到加零一嘅另類運動，同電影好有淵源，早喺1929年美國經濟最蕭條嘅年代，由芝加哥電影公關Leo Seltzer發起，主要畀失業一族有番啲「細藝」兼賺吓獎金，贏咗有成2千蚊美金落袋，喺當時嚟講好過中六合彩！

聯賽急劇增加

4、50年代係「RD」全盛期，每次比賽閒閒哋有3、4萬人入場，睇住班參賽者撞嚟撞去High到震！直至21世紀，正式改做「全女滾」Ladies only，更喺北美一成立好多支Roller Derby team，定期組織聯賽，05年底起計短短9個月內，就由50個聯賽增至超過150個，時至今日，「RD瘋」已吹遍全球，除美國各州外，墨西哥、加拿大、澳洲、英國、比利時、法國、德國、新西蘭以至日本、智利、關島等地，都有自己嘅聯賽，場次多到數唔晒。

滾埋入荷里活

Roller Derby充滿話題性，女人、暴力、動作，更加係電影重要元素，難怪近60年嚟出現過無數講述「RD」故事嘅電影同紀錄片。1949年《Roller Derby Girl》係史上第一部Moive，呢套只得10分鐘長嘅電影仲曾被提名參選奧斯卡。講到最成功嘅「RD」電影就非《Whip it》（滾逐青春）莫屬，套戲改篇自同名暢銷小說，係當年《ET》嘅童星祖娜芭莉摩亞首次執導嘅作品，廣受好評，呢位優質荷里活女星亦喺戲中擔任一角。

Whip it，本身就係「RD」術語之一，意解「抓住隊友手臂借力加速甩出去嘅動作」，電影故事講由加拿大靚女Ellen Page（《潛行兇間》女主角）飾演嘅反叛美少女Bliss，唔想做阿媽扯線公仔參加選美，喺一次機緣下愛上Roller Derby，決定不顧一切加入「RD隊」受訓，追逐夢想，透過運動競賽證明自己存在價值，相當勵志。

冇年齡限制

事實上，咪以為去「滾」嘅一定係壞女孩，其實純情學生妹、OL、行政女強人、甚至師奶大嬸乜都有，年齡由10幾歲到4張幾嘢，佢哋放咗學放咗工湊完仔，就會拋開平日斯文外表，化身性感、火辣又臭檔嘅Rollergirls，扮Punk鬥Rock，惡戰連場，撻到周身瘀傷標晒血，抖完又嚟Jam過！

「RD」=自虐狂？「No啦！」西雅圖Rat city隊嘅Lilly講出「姊妹心聲」：「呢項女權運動完全顯示到女人係強者，唔輕易低頭，仲可以用嚟發洩生活壓力添！」