占士狂窒羅斯　唔配做MVP

韋迪發波瘟？No Problem，勒邦占士幫「閃電俠」執手尾！剛登上最新一期美國《體育畫報》封面的「大帝」，昨仗表現神勇並攻入全場最高的35分，率領熱火加時以101:93勇挫公牛，賽後更寸爆手下敗將戴歷羅斯未夠班攞MVP，果然有風使盡(巾里)！

前晚獨自加操的韋迪，昨日突然發波瘟，全場16射僅5中，開波初段更入樽「炒粉」，瘀到爆！幸好隊友占士交足貨，全場貢獻35分、6個籃板及6次助攻，加上剛榮升老竇的米克米拿及保殊合力轟入34分，最終熱火加時以8分之差擊敗公牛，總比數領先到3:1。

「真正MVP唔靠單打獨鬥」

占士今仗「嘜」到羅斯「一戙都冇」，令後者只得不足3成命中率兼有7次失誤，曾經公開批評傳媒將羅斯吹捧到上天的占士，賽後於記者會句句有骨，明寸羅斯名大於實：「能夠將應屆MVP『嘜』得貼貼服服，令我倍感驕傲，籃球乃團體運動，真正的MVP應該着重Teamwork，而非單打獨鬥！」

Fans扮占媽拍片打氣

剛登上最新一期《體育畫報》的占士，由17歲至今已13次做封面人物，追平紐約洋基傳奇球星Mickey Mantle的紀錄威到盡，難怪賽後如此沙塵。明早熱火造訪公牛，再贏一仗即可成為東岸冠軍，賽前有熱火球迷打扮成「占媽」哥莉亞拍短片為熱火造勢，預料兵敗如山倒的公牛難逃出局厄運，熱火受讓2.5分要下盤。（now635台、有線165及廣東體育周五早上8:30直播）