羅斯叫兩飛賀柏賓

戴歷羅斯閃耀東岸冠軍前哨戰！「牛魔王」昨日以全能表現技壓「助攻王」朗度，率領公牛主場以97:81勇挫爭標勁敵塞爾特人，為柏賓銅像亮相儀式贈興之餘，更「叫兩飛」將目標直指東岸冠軍及常規賽MVP殊榮！

昨日公牛會方於半休時舉行柏賓銅像亮相儀式，以表揚「二哥」昔日協助球隊6奪總冠軍的貢獻。這座半身銅像於上個月製成，將永遠豎立在聯合中心的7號入口。帶同妻子及4名仔女出席慶典的柏賓感觸表示：「除咗多謝之外都唔知講咩好，真係感到好榮幸，効力公牛係我人生旅途中最偉大嘅時光，我會永遠記住！」

柏賓銅像7號入口豎立

柏賓銅像亮相儀式場面感人，公牛上下亦士氣高漲，羅斯昨多次以Crossover玩殘塞爾特人控衞朗度，幾次高難度剷籃更令主場球迷陷入瘋狂狀態，最終全場貢獻30分、5個籃板及8次助攻的「牛魔王」，率領公牛以16分之差贏波錄得5連勝，目前以58勝20負戰績雄踞東岸榜首，並領先隨後的「綠軍」及熱火4場勝仗，在常規賽只餘4輪的情況下，東岸冠軍寶座幾成為囊中物。

或成最冇效率MVP

常規賽MVP獎項由傳媒投票選出，羅斯雖被傳媒吹捧為大熱門，但論卡士及數據明顯不及勒邦占士及杜域侯活。據《ESPN》所公布的最新球員效率榜（見表），羅斯的效率指數只有23.77分，以歷屆常規賽MVP得主至少有25分作為標準，「牛魔王」明顯未達標，不過灰熊後衞東尼阿倫、木狼前鋒杜利華及太陽射手杜利皆對羅斯投下信心一票，其中杜利就透過Twitter表示：「睇住羅斯點樣玩殘塞爾特人之後，我諗冇人會再話羅斯唔值得攞MVP喇啩。」