「鬼佬Size」張小倫被迫緊貼歐洲Fashion

張小倫有型有代價！這位亞運劍擊銀牌得主「型男」身高1米88、肌肉發達，買衫就必須揀「鬼佬Size」歐洲「貴貨」，幸好「小倫」經常到歐洲集訓，故此每次都趁機大手掃貨，既一解捱貴衫之苦，亦能緊貼着歐洲時裝潮流！

劍擊場內一身白色戰袍型到爆、場外打扮亦「身光頸靚」，但張小倫卻有苦自知：「其實我都想着得簡單一些，『牛記笠記』最舒服，可惜街邊『執平貨』店舖一定冇我Size，次次都要去歐洲進口店，『硬食』捱貴衫。可能自己難搵衫，所以平日行街Shopping都會多留意衣櫥，養成對時裝的直覺，對襯衫方面都叫有點研究！」

為免經常「捱貴衫」，「小倫」每次出外比賽集訓都會「掃貨」：「每次大型比賽過後，港隊都有一天私人時間，我就趁這機會到街上走一走Shopping，基本上全年要買的衣衫也是靠這一日了。」

執執髮型model都做得

張小倫有高度、身形好、有Camera Face，香港星級形象指導郭慶彬認為以其本錢極有做Model條件：「只要執一執個髮型就OK！另外，我會建議他將來可以嘗試穿今夏男仕最流行的長身薄褸，除可增加飄逸感，還可襯出『小倫』高挑身形！」

認識張小倫

年齡：25歲

身高/體重：1米88/85公斤

威水史：10年廣州亞運花劍個人賽銀牌、團體賽銅牌

10年全國冠軍總決賽花劍個人賽季軍