蔡芳裕仲有貨交！

上周五籃球壇上演了一場精彩的紅黃大戰，本地甲一銀牌南華對永倫。今場球賽之所以令我特別關注，第一是球迷們再次逼爆修頓；其二則是羅意庭回歸。

南華雙塔睇唔住大師兄

言歸正傳，今仗論實力雙方各有千秋，可是半場永倫落後15分，相信大部分球迷都認為「黃衫軍」輸定了，但去到第三節剩餘6分鐘，蔡芳裕登場即把賽事推向高潮。阿裕甫落場即連取6分，把士氣重新燃點。事實上，首年打甲一的南華中鋒留棟樑表現不俗，只可惜守不住大師兄準繩的中距離。到換上另一名中鋒Duncan同樣又是守不住阿裕，最終永倫眾將交足功課，南華則在關鍵時刻射失了4個罰球後招敗。

理論上阿庭回歸是件好事，但過去一年他在CBA坐多過打，只能說見識多了，可是狀態卻成疑。另邊廂永倫狀態一般，卻勝在活力經驗俱備，球員又夠當打。我相信南華之後一定會翻看錄影帶檢討今仗敗因捲土重來，最終銀牌賽相信必須打第三場才能分勝負。最後都要講多三句：老蔡有火！老芳有貨交！老裕好波！