哥帥領軍訪日為災民打氣

日本地震震撼體壇，就連巴塞都唔例外，除咗喺官網表達關注同慰問外，主帥哥迪奧拿仲透露，呢支「地上最強」球隊稍後將訪問日本，親身為災民打氣。至於家鄉為仙台市的乒乓球手福原愛則傷心得變咗喊包。

「舊居民」薛高卡卡悲痛

哥迪奧拿話：「我希望日本人民能夠喺災難中重拾信心，重建家園。我預計稍後會率領巴塞大軍訪問日本，目的係想將我哋嘅力量傳送畀佢哋。」至於曾經喺日本搵食7年嘅巴西名帥薛高，就話睇完今次海嘯片段後覺得好驚，啲車同船就好似玩具一樣畀水沖走，佢鼓勵日本國民捱過今次低谷。至於11歲嗰陣曾隨聖保羅到日本，喺山形住過嘅卡卡，都為事件覺得悲痛。

世界花滑賽延期隊際賽取消

另一方面，家鄉為重災區仙台市嘅日本著名女子乒乓球手福原愛，地震發生期間雖然正喺廣州練習，但據聞佢目睹故鄉慘況後，連日嚟都哭成淚人，仲叫家人去中國避難，但係就被婉拒。至於原定本月21日喺東京舉行嘅世界花樣滑冰錦標賽，由於福島核電站持續出現事故，加上德國、美國花滑隊均表態會退出，故賽會決定暫將賽事延期，甚至取消，4月中喺橫濱舉行嘅世界隊際賽亦告「流產」。