比力克格芬入樽賽封王

比力克格芬憑花臣加人氣鋤爆洛城榮膺「入樽王」！昨早舉行的「全明星周末」重頭戲，新人王格芬一如所料搶盡風頭，除了模仿「飛人」卡特的360度風車轉兼招牌「掛爐鴨」入樽外，更於決賽飛過汽車「拆你屋」贏盡掌聲，力壓麥基榮膺「入樽王」。反觀人氣輸蝕的迪羅辛就鬱鬱不歡，更於Twitter大講晦氣說話，揚言不再參加入樽賽！

縱然美國媒體不斷報道NBA早就決意捧格芬做「入樽王」，然而另外3位參賽者依然做足準備，期望能打動球迷締造爆冷賽果。當中以頻頻換波鞋的巫師中鋒麥基最具創意，除出動母親，前WNBA名將Pamela拉票之外，其雙手入兩樽、一次過鋤3球樽的高難度動作更為他取得接近完美的分數躋身決賽。

迪羅辛輸得唔忿氣

於首圈表現一般的格芬勝在主場出擊贏人氣，決賽階段先有大班演唱者獻唱《I Believe I Can Fly》為他打氣，之後更接應巴朗戴維斯傳送、飛身躍過贊助商汽車大力鋤樽，卒之獲得68%球迷投票榮膺「入樽王」！

不負眾望的格芬，領獎後表示：「飛車入樽係我嘅主意，其實只係排練過4次，不過見到在場球迷咁亢奮，冒住受傷嘅危險都係值得！」

飲恨的麥基則打趣稱：「早知我帶埋飛機嚟參賽。」雖然比力克格芬聲稱「飛車入樽」是原創，不過這招其實早就有人用過，斯洛文尼亞球星米力早於95年已完成這項表演，足足比格芬早了16年呢！

明星賽波飛最貴3.7萬

有人歡喜有人愁，貴為去屆入樽賽亞軍，要靠班頓真寧斯退賽才得以補上的迪羅辛本已認為得不到應有認同，昨日施展底線起跳胯下入樽亦只落到首圈出局收場，難怪這位速龍球員賽後透過Twitter指人氣比入樽難度遠遠重要：「我唔會再參加入樽賽，除非喺多倫多（速龍所屬城市）舉行！」查實另一位參賽者伊巴卡亦諗頭十足，罰球線起跳同咬公仔入樽均贏盡掌聲，美國傳媒就指今次入樽賽屬近10年來最經典的一屆。

今屆明星賽周末咁多驚喜，難怪波飛早早售罄。據美國網上售票網tiqiq.com數據顯示，即使今屆NBA「全明星賽」最前排波飛票價高達4,756美元（約3.7萬港元）、山頂位要1,000美元（約7,800港元），史達普斯場館的波飛亦供不應求。