雷阿倫爭做雙料3分王

除了入樽賽，今日進行的3分賽亦是球迷焦點，因為皮雅斯及雷阿倫兩名塞爾特人3分王將同室操戈，賽前皮雅斯大講廢話試圖打擊隊友，不過雷阿倫卻一於少理，積極練波，成功找到秘訣，誓要成為「雙料三分王」！

今屆3分賽有6名參賽者，但賽前眾人焦點都放在雷阿倫及皮雅斯身上，事關皮雅斯是上屆3分賽冠軍，而雷阿倫早前則超越溜馬一代球星米拿，成為NBA史上入3分球最多球員，兩大3分王兼同隊隊友過招，未打已叫人期待。

皮雅斯廢話騷擾

賽前雷阿倫大爆近期不斷被皮雅斯說廢話騷擾：「皮雅斯同其他人講，話我上次贏3分賽已經係喺10年前，依家咩都變晒啦，話我係恐龍！」事實上，皮雅斯對衞冕可謂志在必得，對傳媒表示：「雷阿倫係3分皇帝，但我係3分冠軍呀！我真係唔驚雷阿倫，最好叫埋魯域斯基同史杜積高域一齊鍊過！」

相對皮雅斯，雷阿倫顯然比較謙虛，表示會在賽前及比賽日積極練習3分球，並聲稱已找到秘訣：「一定要留意『金錢球』（為今屆明星賽而特製的籃球，每球射入計2分，普通只計1分），因為粒波會比較黏手，很易射失，節奏係關鍵。」