宣傳使得全城買飛救黃蜂
當日NBA聯盟破天荒收購新奧爾良黃蜂，目的係唔想買家入主後搬竇，所以先決定暫時接手，再小心奕奕物色願意「留城」嘅新買家。奈何新奧爾良唔係咩大城市，市場咁細真係好難發圍，難怪當地球迷咁擔心下手買家會搬竇。
避免新班主搬竇
根據NBA規例，若果黃蜂由依家到月底嘅平均入座率唔夠15,000人，新班主可以隨時決定搬竇。之不過呢支西岸球隊上星期四主場硬撼湖人場波，就出現今季第2次門票售罄情況，除咗話戲碼強係主因之外，原來幕後仲有班好幫手。
據美國媒體《CBS》透露，新奧爾良理事會連日嚟忙住籌集資金買主場波飛，主席韋伯更積極做宣傳，號召當地團體機構同市民支持球隊。單係過去幾個星期，28間企業就足足掃咗14,000張波飛，據講唔少平時喺屋企睇波嘅Fans，都願意真金白銀買飛入場支持，證明韋伯條宣傳大計使得！