美斯增高C朗搞基？

2010年世界體壇風起雲湧，運動員明星化、體育娛樂化，唔少超級巨星都爆出匪夷所思、駭人聽聞嘅消息。既然靚仔C朗拿度要搵代母生仔、桌壇天王希堅斯要打假波、連八爪魚都話識得估波，呢個世界仲有咩事係Impossible？2011年體壇盛事連連，想預知有乜事發生，梗係要搵「神算」八爪魚先生重返人間，嚟個體壇大預言啦！

預言1 美斯三度發育勁增高

美斯天下無敵，唯一缺點係生得矮，不過唔使驚，中國神奇發明可能幫到佢。依家人民幣不斷升值，個個爭住搵，C朗都受唔到誘惑幫洗頭水賣廣告，馬納當拿又話做安防系統代言人，美斯最啱賣咩廣告？梗係經常出現洗腦式電視廣告嘅人體增高器啦，閒閒哋都話百天增高12公分，嚟緊2月阿根廷國家隊友賽葡萄牙，「高佬」美斯隨時頭槌頂贏C朗添呀！

熱身賽大戰　阿根廷 Vs 葡萄牙

日期︰2月9日

精彩度︰●●●●

預言2 C朗卡斯拿斯斷背擁吻

桃色新聞係2010年體壇一大主題，睇怕今年都唔例外。最多狗仔隊跟嘅葡萄牙球星C朗拿度，上年搵代母生B令全世界嘩然，更有傳呢位鍾意搽腳甲嘅皇馬巨星，其實係同性戀者。C朗向來做嘢出人意表，話唔埋有日會喺Twitter宣布自己係一名「同志」。咁啱隊友卡斯拿斯上年底又同女伴莎拉散咗，如果因為咁直變攣同C朗搞埋一齊，再喺西甲國家打吡擊敗死敵巴塞後，嚟個「新世紀擁吻」慶祝，咁仲唔係年度經典鏡頭？

國家打吡　皇馬 Vs 巴塞

日期︰4月17日

精彩度︰●●●●●

預言3 手機女神拆彈踢世盃

以一招胸夾手機震撼全球嘅「手機女神」Larissa Riquelme，以佢偉大身材同超強人氣，新一年唔難吸引更多商品搵佢做代言人。iPhone5、i乜i物都好，只要夾得住嘅都會陸續有嚟！假如「夾嘢」都睇厭咗，講唔定會嚟招「拆彈」再戰江湖，唔做「肉女」做「玉女」，都一樣有市場。再唔係「拆完彈」夠晒輕身跑得快好多，到時轉行幫巴拉圭女足踢今年嘅德國世盃，肯定個個都嗌好波呀！

德國女足世界盃

日期：6月26日至7月17日

精彩度︰●●●●

如有LR加2隻

預言4 複製保羅再發功

科技發展日新月異，複製動物已經唔係咩新鮮事，既然多莉咁大隻羊都可以複製，咁區區一隻八爪魚照計難唔倒班科學家啩！保羅喺南非世界盃期間「八發八中」，都唔知幾多賭仔當佢神咁拜，掀起嘅熱潮絕對唔講得笑，雖然呢隻「神算八爪魚」已經過咗身，之不過廣大球迷依然對佢念念不忘，話唔埋科學家已經着手做嘢，複製緊保羅二代，喺嚟緊嘅歐聯決賽度再次出嚟發功，益吓班賭仔呢！

歐聯決賽

日期︰5月28日

精彩度︰●●●●●

預言5 飛人保特變身紅魔鬼

牙買加飛人保特除咗跑步之外，都好熱愛踢波兼大爆鍾意曼聯，仲試過去紅魔基地教當時仲喺隊嘅C朗一啲衝刺秘技。既然保特近年喺100同200米都屈晒機，正所謂無敵就最寂寞，話唔埋保特今年會因為冇對手宣布提早結束短跑生涯，連世界賽都放棄衞冕，加盟心愛球隊曼聯。畢竟保特今年先得24歲，速度又有保證，就算腳法麻麻，落到場周圍跑，已經夠對方後防嚇餐死啦！

世界田徑錦標賽

日期︰8月27日至9月4日

精彩度︰●●●半

預言6 熱火爭冠軍簽夠6巨頭

坐擁占士、韋迪同保殊嘅熱火，新季已經輸過畀塞爾特人、魔術同小牛3支爭標分子，證明有3巨頭唔係打橫行，喺季後賽失落總冠軍有幾奇？既然安東尼咁恨攞冠軍，只要佢願意減薪絕對可以過檔熱火同占士拍住上。再講熱火後備兵源薄弱，橫掂艾佛遜喺土耳其生活得麻麻、安東獲加為還債仲打緊發展聯盟D-League，熱火最多簽埋呢兩位過氣球星，6巨頭聚首邁阿密絕不是夢！

NBA季後賽

日期︰4月16日開始

精彩度︰●●●半

預言7 舒拉寶娃胡查錫分手收場

舒拉寶娃同胡查錫雖然已經訂咗婚，但畢竟舒娃人靚身材正，而胡查錫除咗高之外冇樣掂，令唔少妒火中燒嘅男士，包括舊愛魯迪克在內，都想搶番舒娃埋自己身邊。事實上胡查錫自己又唔爭氣，離開冠軍隊湖人加盟弱旅籃網，仲要連正選都爭唔到，完全襯唔起天后舒拉寶娃。加上四出征戰嘅舒娃見舊愛魯迪克隨時多過喺美國嘅老公，容乜易畀人乘虛而入舊情復熾，同胡查錫分手收場。

預言8 拿度右手打瓜費達拿

網壇天王費達拿喺啱啱嘅年終賽封王後，已經講明2011年將捲土重來挑戰宿敵拿度，你估拿度唔會有備而來咩！話唔定呢隻左撇子嘅「野獸」一早已經苦練成右手揸拍，仲去到可以開出強勁發球同扣殺添。不過秘密武器梗係留番四大滿貫嘅決賽對撼先使出啦，呢下突然「轉軚」一定令費達拿目瞪口呆兼無所適從啦！

網壇四大滿貫

澳網 1月17至30日

法網 5月22日至6月5日

溫網 6月20日至7月3日

美網 8月29日至9月11日

精彩度︰●●●●