阿堤斯懶得記三角戰術
昔日喺溜馬打到曉飛嘅阿堤斯，自過檔湖人後跌晒Watt，今季各項數據更創出新低，場均只有7.6分、3個籃板同1.7次助攻。呢位敢言前鋒早排就向《ESPN》爆料，表示今時今日仲唔明咩係三角戰術，難怪打得咁曳！
湖人王牌教練積遜係三角戰術嘅宗師，昔日佢就係靠呢套戰術創造公牛王朝，湖人今季表現反覆，傳媒同球迷都將矛頭指向阿堤斯，佢日前就向《ESPN》大吐苦水：「我根本唔明咩係三角戰術，呢套戰術有成千個變化，點記呀？有時積遜教練會問我企喺度做乜，我根本唔知點走位，咪惟有唔郁囉！」
據美國媒體《CBS》透露，阿堤斯嘅上陣時間愈嚟愈少，正選席位遲早畀「防守專家」班尼斯搶埋！亨格比利仲收到風，阿堤斯早排搞咗個Party，但高比仔、「禪師」同奧當等巨頭都甩晒底，得禾頓同祖殊包維等「大茄」撐場，阿堤斯唔Down就假咯，惟有畀心機參透吓三角戰術嘅真諦啦。