曼聯嫌碧咸老吼楊格仔

碧咸早前話想喺一月轉會窗重開後到歐洲落班，仲話曼聯係佢嘅首選，不過領隊費格遜尋日就請佢食檸檬，有傳費Sir嘅目標係維拉翼鋒艾舒利楊格，擺明係要嫩唔要老！

碧咸為咗重返英格蘭國家隊，過去兩個冬季都由洛杉磯銀河外借到AC，不過AC今季人才濟濟，「萬人迷」惟有轉移目標，向母會曼聯送秋波。但曾經同「萬人迷」上演過「飛砵事件」嘅費Sir，尋日就直指年屆35歲嘅碧咸太老唔值得借：「我應該從來冇簽過呢個年紀嘅球員，再者曼聯中場已經有足夠兵源。」

車曼大戰3月1日補賽

不過記性好的話就發現費Sir係自打嘴巴，皆因曼聯近年曾簽過白蘭斯、軒歷拿臣同哥林3位年過35嘅球員，相信碧咸聽到恩師咁講都幾大打擊。至於費格遜雖講明中場夠晒人用，但據《鏡報體育》透露，費Sir打算喺一月引入艾舒利楊格，成事的話佢仲可以替曼聯喺歐聯上陣。

此外，早前因大雪取消嘅「車曼」大戰，暫定於明年3月1日補賽，但若果其中一隊要喺足總盃第5圈重賽的話，呢場大戰將要再度改期。

球員：迪米捷利斯

原屬球會：拜仁慕尼黑

斟介球會：馬拉加

位置：中堅

轉會指數：已落實

簡介：馬拉加宣布借得迪米捷利斯，若果球會成功護級，將以300萬歐元買斷呢名阿根廷中堅。

球員：羅比堅尼

原屬球會：熱刺

斟介球會：伯明翰、維拉

位置：前鋒

轉會指數：●●●

簡介：伯明翰同維拉兩支宿敵都表明有興趣，伯明翰領隊麥利殊要求會方開水喉，以滿足熱刺600萬鎊嘅報價。

球員：沙保沙

原屬球會：馬德里體育會

斟介球會：比錫達斯

位置：翼鋒

轉會指數：已落實

簡介：沙保沙同効力不來梅嘅國家隊隊友、前鋒曉高艾美達雙雙轉會比錫達斯，而沙保沙會簽約兩年。

球員：基雲

原屬球會：曼城

斟介球會：羅馬

位置：門將

轉會指數：●●●●

簡介：曼城唔想將佢賣畀其他英格蘭球會，因此羅馬最有可能成為呢位34歲愛爾蘭門將嘅下一站。