馬贊比靠巫術定靠老細？
馬贊比憑乜打入世冠盃決賽？籠統啲講，係一股神秘力量，意大利《米蘭體育報》仲認為係巫術响背後搞鬼，其實再研究深入啲，馬贊比個老細查普維先至係嗰股神力。
《米蘭體育報》起咗查普維個底，話佢青少年時代窮到燶，仲幾次幾乎因戰亂餓死，後來輾轉去咗塞拉利昂、阿比讓搵食，幾年前仲係礦工一名，點知佢加入一個名「約魯巴」嘅組織，同啲宗教領袖、巫師認識之後，馬上風生水起，仲做埋馬贊比嘅主席，好多人都認為，查普維離奇發迹，完全係靠巫術之助，至於馬贊比今次喺世冠盃咁掂，更加因為佢哋嘅球員入面，包含剛果民主共和國各個種族，於是剛果各族嘅巫師都一齊發功幫佢哋咁話。
每年人工使8,280萬
先唔理係咪有巫術存在先，查普維份人好捨得使錢，對隊波有好大幫助，佢每年淨係花喺馬贊比嘅薪金就有800萬歐元（約8,280萬港元），佢哋嘅頂級球星年薪有20萬歐元，喺非洲屬天文數字，比一般公務員高近50倍有多，自不然好易撬到啲好球員，而且個個都肯幫佢搏命添。