伊度奧蘇亞雷斯「茅王」上身

蘇亞雷斯同伊度奧兩位世界級射手，喺剛啱過去嗰輪聯賽齊齊「茅王」上身！睇落乖乖仔嘅蘇亞雷斯一反常態，竟然化身「拳王」泰臣咬對手；至於伊度奧就向法國球王施丹偷師，喺意甲戰場重演06世界盃嘅經典鐵頭功！

「獵豹」或停賽4場

阿積士同燕豪芬喺上周日爆發荷甲大戰，最終雙方互交白卷，不過高潮就出現喺比賽末段。話說阿積士中場連特格倫領紅被逐，雙方球員圍埋一堆吵大鑊，蘇亞雷斯唔知發咩神經，竟然一口咬落對方中場巴卡爾個膊頭，雙方球員兼球證即時呆晒唔識反應，可憐巴卡爾個膊頭就畀蘇亞雷斯咬到腫晒。

蘇亞雷斯化身做泰臣，另一位頂級射手伊度奧亦都唔示弱。呢位國米前鋒喺前晚意甲受到嚴密看管，上半場硬食咗基爾禾守將保斯贊施薩一掌博得犯規，懷恨在心嘅「獵豹」隨即施展施丹鐵頭功頂撞對手報復，搞到保斯贊施薩要抬出場邊治理。

據意大利電視台《Rai》嘅唇語專家分析，當時伊度奧笑笑口走埋球證度，反指保斯贊施薩扮嘢，正一蠱惑仔！之不過天網恢恢，意大利《全市場》話足總將追加刑罰，極有可能判罰伊度奧停賽4場，若果係真嘅話，絕對令戰績低迷嘅國米雪上加霜。