肥安失話事權似做技術總監

車路士上場作客輸畀伯明翰後，近4場聯賽輸咗3場，畀曼聯追到同分，令外界盛傳領隊安察洛堤即將被炒，但佢尋日就作出大反擊，指自己畀球會削權，已經做唔到一個領隊可以做嘅嘢，更暗示可能會主動辭職。

離隊賠率封盤

據英國《太陽報》報道，「肥安」已經同英超領隊協會接觸，傾自己喺車路士嘅前途問題，呢位意大利籍領隊表示，覺得自己已經冇晒話事權：「如果將我同費格遜比較，會發覺佢喺球會有完全嘅控制權，而我嘅地位就好唔同，好多嘢都唔到我控制，似一個技術總監多過領隊。」

事實上，車路士近日喺冇通知安察洛堤嘅情況下，突然將其副手韋健士辭退，換來連教練牌都未有嘅艾文尼路接任，此舉已經惹來「肥安」極度不滿，同時亦印證到佢喺球會逐漸失勢。差劣戰績加上連番針鋒相對嘅舉動，令到安察洛堤同車路士「分手」傳聞甚囂塵上，而佢離隊嘅賠率就連續幾日轉熱，博彩公司威廉希爾更索性封埋盤。