朗尼嫖妓搬上舞台

朗尼回歸慘被曼聯o靚仔寸爆！因嫖妓兼跳草裙舞搞到神憎鬼厭嘅朗尼，啱啱先為曼聯復出，不過呢位前鋒似乎已失去隊友嘅信任同尊重，就連「紅魔鬼」嘅青年軍都唔賣佢帳，準備喺曼聯傳統嘅聖誕話劇表演，喺費Sir同一眾曼聯球星面前惡搞朗尼嫖妓事件，擺明唔放大師兄在眼內！

曼聯年年聖誕節開Party都搞出事，費格遜已勒令禁止一眾球星再開P，不過球會傳統嘅聖誕話劇表演就例外。原來曼聯16至19歲青年軍，每年都會喺卡寧頓訓練基地表演話劇，為費格遜同一眾球星提供娛樂。英國《太陽報》爆料，呢班o靚仔今年準備玩嘢，化身「福祿壽」寸爆朗尼嫖妓。

經理人豪宅遭球迷掟石

呢班冇識死嘅青年軍，已經將古仔定名為《聖誕香煙門》，內容係惡搞朗尼趁老婆麥露蓮大肚走去嫖妓，喺酒店「搞完」後用200鎊同職員買「事後煙」橋段。消息人士話：「班o靚仔有好多鬼主意，我諗朗尼要先做定最壞打算。」齋聽個古仔已經非常到肉，唔知費格遜同朗尼睇表演嗰陣有咩感覺呢？

暫時未有消息話費Sir會禁止呢次表演，事實上朗尼多年前嫖「祖母級」妓女一事，都做過聖誕話劇表演橋段，睇嚟朗尼有排都贏唔番其他人嘅尊重。朗尼經理人史達福特都唔好得好多，《鏡報》指之前包圍朗尼大宅嘅激進球迷，日前又走去包圍史達福特豪宅狂掟石頭，不過原來史達福特幾個月前同老婆分居後已搬走咗，班球迷又白掟一場。