禾確特當選英超速度王
禾確特當選英超速度王
阿仙奴小將禾確特一向以速度見稱，但估唔到佢一班隊友原來都拍得住佢，喺日前公布嘅英超頭10位速度王入面，單係阿仙奴就佔咗3個。
兵工廠簽日本天才宮市亮
英國《太陽報》早排委託咗顧問公司研究英超球員嘅速度，日前就公布咗全英超跑得最快嘅頭10位球員。熱刺陣中只得左翼加里夫巴利入圍，但都只係排喺第9位，比3位入圍嘅阿仙奴球員都要慢。翼鋒禾確特以每小時36.53公里，大熱當選「英超速度王」，但最令人意想不到嘅係，中場指揮官法比加斯原來都速度驚人，以時速35.49公里位列第4，至於左閘基捷基治就排第7位。
雖然兵工廠前中後三線都已經有位「疾風號」喺度，但領隊雲格睇嚟仲未滿意，根據《每日鏡報》透露，阿仙奴將會簽入17歲日本天才宮市亮，一切只待勞工證批出。
宮市亮喺夏天曾經到阿仙奴試訓，相信雲格睇中佢嘅驚人速度將非常之配合兵工廠踢法，所以急不及待要將佢收歸旗下。