魯殊撐紅軍下屆返歐聯

魯殊曾為紅軍勇奪五次頂級聯賽錦標，射入229個聯賽入球，名副其實係神級射手。日前超過50人嘅「亞洲記者團」，浩浩蕩蕩乘大巴到位於Frankby嘅Hillbark酒店，魯殊千呼萬喚身穿黑色西裝出場，風采依然。

晚飯過後，魯殊受訪時話雖然紅軍依家成績麻麻，係因內外不安因素大傷元氣，畀啲時間就會好番。問到紅軍18次頂級聯賽冠軍紀錄已被曼聯追上，魯殊一臉「So what」姿態話：「利物浦始終係英格蘭最偉大球會，就算畀曼聯打破紀錄都冇問題，乜盃都畀利物浦贏晒就唔再好玩啦！」

同時魯殊又預言：「有謝拉特同托利斯孭飛，今季最後肯定會入番前4，重返下屆歐聯，球會收入多番就會愈搞愈好。」對於新老細約翰亨利，呢位射手寄予厚望：「佢擅於經營運動事業，之前搞紅襪隊有聲有色，利物浦有佢撐腰前途無限。」