晏菲路麻雀雖小五臟俱全

雖然利物浦嘅晏菲路球場僅能容納4萬多人，容量同規模都好難同魯營、聖西路呢啲著名球場相比，但反而存有一種樸實感，加上喺博物館內陳列多不勝數嘅獎盃，令人相信呢條「紅色」巨龍總會有甦醒嘅一日。

設施風格樸實無華

早兩日「亞洲記者團」應渣打之邀，曾到過晏菲路球場後門，親眼見到希斯堡慘劇墓碑，碑底放滿有心人嘅鮮花，想當日謝拉特嘅10歲表哥基荷利，就係呢宗慘劇嘅其中一名死者，後來其父母不斷鼓勵謝老四，促使佢今日成為「神奇隊長」。一宗悲劇，就成為一個傳奇球員誕生嘅契機。

入到晏菲路，球場經理史提芬先生不停介紹球會嘅經典時刻同人物，杜格利殊、辛基利、基瑾、魯殊等大名如雷貫耳。行入紅軍更衣室，睇到裏邊掛住一眾紅軍球星嘅戰衣，一張昔日偉大球員圍坐於更衣室內嘅巨型照片，同球會風格一樣樸實無華。

據聞多數利物浦球員走出球場前，都會拍拍「THIS IS ANFIELD」牌匾，昔日光輝歲月刺激球員場上神經。望望觀眾席，再坐喺椅子繡有紅軍會徽嘅獨有後備席，Ryan不禁舉起LIVERPOOL頸巾、凝望球場每個角落，輕聲對自己講：「我愛紅軍，無悔無憾！」