熱刺驚天逆轉3:2拆廠

尋晚上演嘅英超北倫敦打吡爆發法國內戰，阿仙奴中場拿斯尼賽前竟然喺眾目睽睽之下拒絕同仇人加拿斯握手。雖然阿仙奴憑拿斯尼先開紀錄同查馬克入波領先2:0，但熱刺喺下半場發威連入3球反勝3:2，爆出34倍「主客」，1993年以嚟首次作客贏兵工廠，今次亦係阿仙奴13年嚟首次喺聯賽主場錄得兩連敗。

阿仙奴中場拿斯尼賽前向友人爆料，話昨仗賽前堅決唔會同倒戈嘅加拿斯握手，原因係加拿斯曾經喺自傳話過拿斯尼喺08年歐國盃目中無人，自此兩人就交惡到依家，拿斯尼更承認超過一年冇同加拿斯傾偈。雖然阿仙奴領隊雲格同一班隊友賽前齊做和事老，不過拿斯尼喺握手儀式依然當加拿斯透明！

17年來首度作客贏阿仙奴

昨仗甫開賽加拿斯即粗野攔截拿斯尼，不過拿斯尼好快就成功報仇，佢喺9分鐘單刀推過熱刺門將靴里奴高美斯，窄位起腳慢溜尾袋入網。27分鐘，兵工廠再憑前鋒查馬克近門撞入領先2:0完半場。

落後兩球嘅熱刺喺下半場換入養傷多時嘅射手迪科爾，表現即判若兩隊，佢哋先喺50分鐘憑加里夫巴利接應雲達華治妙傳單刀入波追成1:2，再喺17分鐘後藉法比加斯喺禁區內犯手球獲判12碼，由雲達華治操刀扳平。

踢到完場前5分鐘，氣勢如虹嘅熱刺更由中堅卡保奧接應雲達華治開出嘅罰球頂入，成功上演驚天大逆轉反勝3:2，17年以來首度作客擊敗阿仙奴。