里奧上晒癮變毒男
里奧上晒癮變毒男
里奧費迪南變毒男？佢日前接受訪問時話自己自世界盃後就一直沉迷玩Twitter，原因係佢覺得咁樣有助同球迷嘅溝通。
里奧費迪南本身係英格蘭國家隊隊長，可惜喺賽前集訓時受傷緣盡決賽周，佢治療呢個心靈創傷嘅方法原來非常特別，日前佢接受訪問時話：「作為隊長我好想帶領國家隊踢世界盃，所以我當時情緒極度低落，每日都只可以長時間玩Twitter同隊友、球迷溝通，跟住就一直沉迷呢個玩意直到依家，我已經中晒毒。」
目前里奧喺Twitter已經有超過175,000個追隨者，佢認為咁有助拉近同球迷之間嘅距離，佢仲笑指費Sir雖然知道有Twitter呢樣嘢，但就唔信佢會癲埋一份。同時里奧亦大爆喺曼市打吡前，成隊一齊喺更衣室聽一啲八十年代嘅懷舊金曲，左閘艾拉更做埋DJ。