曼聯2:2逼和維拉

尋晚英超維拉主場對曼聯之戰峰迴路轉，兩隊喺完場前18分鐘內合共炮製4個入波，最終紅魔喺落後0:2劣勢下連入兩球戲劇性扳平2:2，繼續保持今季聯賽不敗身，暫以3分落後少踢一場嘅榜首車路士，好在紅魔亦有好消息傳出，有報道話朗尼美國之旅行為良好，尋日已經回歸英格蘭，費格遜仲準備畀佢喺下星期嘅英超披甲添！

維拉尋日主場對曼聯，派出多個「生牯仔」上陣，當中年僅21歲嘅中場莊拿芬賀治更喺英超處子披甲，維拉上半場仍可以同曼聯踢成均勢，雖然論埋門威脅以曼聯較大，可惜始終搵唔到破門方法，兩隊半場打成0:0。

馬捷達維迪入波做救世主

換邊再戰，維拉中場馬克艾拜頓喺英格蘭領隊卡比路入場觀戰之下分外落力，先後頭頂腳踢僅告斜出，之後維拉仲有守將占士哥連斯、前鋒艾邦拉荷頂中楣同射中柱。雖然維拉喺72、76分鐘，憑艾舒利楊格喺禁區內被布朗侵犯博到12碼，親自操刀射成1:0，同埋馬克艾拜頓接應達寧傳中撞射建功領先兩球，不過曼聯則喺完場前9分鐘內，先由後備入替嘅馬捷達追成1:2，再由尼曼查維迪建功扳平，幸保1分完場。

魔童玩《FIFA 11》唔撐隊友

另方面，上星期去美國接受特訓兼療傷嘅朗尼，據報訓練時好落力，同佢一齊去嘅紅魔鬼助教費倫話：「朗尼朝早同晏晝都有練波，我哋一班職員都好滿意佢嘅態度同所做嘅一切。」消息指朗尼尋日已經飛返英格蘭，費格遜見到朗尼咁生性當然好開心，佢仲已經叫咗卡比路唔好召「魔童」入伍備戰嚟緊國際賽，等呢位射手可以喺下周末主場對韋根嘅英超擔正。

英國《太陽報》近日爆料，話朗尼玩大熱電子遊戲《FIFA 11》時嘅最佳11陣容（見附表），只有佢同尼曼查維迪係曼聯球員，死敵曼城亦都有兩個球員「上榜」，朗尼似乎嫌曼聯班隊友未夠班喎！