公關大師睇好巴利超朗尼

加里夫巴利「錢」途無限！呢位21歲熱刺新星近期人氣爆燈，葡萄牙權威網站《足球經濟》尋日公布嘅最有價值新星榜，加里夫巴利力壓禾確特殺入Top10。更令人興奮係，世界頂尖公關克利福特公開預測，睇好佢未來5年場外激搵2,000萬鎊（約2億5,000萬港元），甚至可以超越朗尼成為英倫Icon！

碧咸、C朗拿度相繼離開之後，英超打造嘅「偶像級球星」就數到朗尼，不過呢位曼聯射手唔爭氣醜聞多多，世界知名嘅公關大師克利福特日前就大膽預測，近期強勢彈起嘅加里夫巴利將成英超No.1球星：「加里夫巴利好年輕、外形討好、態度和善兼係英國人，呢啲元素正正係做巨星嘅神奇方程式。」

勝在唔似朗尼咁自大

曼聯、巴塞隆拿、國際米蘭等大球會正爭相收購呢位威爾斯國腳，熱刺領隊夏利列納唔單止為佢定價5,000萬鎊（約6億2,700萬港元），同時開出5萬鎊周薪新約利誘續約，克利福特亦呼籲加里夫巴利唔好為錢離隊：「加里夫巴利係天才球員，最重要佢唔似朗尼咁自大，我相信佢未來5年可以喺廣告、肖像權等地方賺2,000萬鎊！」

殺入最有價值新星10大

雖然加里夫巴利今季先開始走紅，但已經超越比佢早起步嘅禾確特成為英倫第一新星，《足球經濟》尋日公布嘅最有價值新星榜，加里夫巴利就被評估價值達1,650萬歐元（約1億8,000萬港元）排第9，其餘上榜嘅英倫球員就得禾確特（15）同魯迪維爾（16），至於柏圖、巴洛迪利同湯馬士梅拿就包攬三甲，柏圖嘅價值更高達4,000萬歐元（約4億3,800萬港元）。