曼城3連敗文仙尼等炒

「我會留喺曼城，直到佢哋炒我。」曼城尋日凌晨喺歐霸盃A組作客以1:3慘負列治普斯納，恥辱性3連敗，不過成為箭靶嘅領隊文仙尼，賽後講明絕對唔會主動辭職，實行等炒攞賠償。另一方面，利物浦喺K組靠隊長謝拉特後備入替連中三元，主場以3:1打沉拿玻里攞到3連勝，教頭鶴臣總算鬆口氣。

雖然曼城由艾迪巴約一度追成1:1，最後都要慘敗畀列治普斯納，賽後文仙尼唔願認衰，死撐連敗係因為傷兵太多：「我嘅立場好明確，我會留喺曼城，直到球會炒我。當然，我對呢場波戰果好失望，如果再比賽100次我哋至少可以贏90次，可惜我哋運氣唔夠，而且有10個球員冇隨隊。」

謝四中三元追平雲佬

當被問到球員集體作反傳聞，文仙尼甚至發晦氣冇品鬧記者：「好，我同泰維斯、耶耶托尼、高路托尼都有心病，或者其他球員一樣唔妥我，咁得未？我見過班主文梳亞幾次，關係非常好，啲人想無中生有咪由得佢囉，總之所有關於我被孤立嘅傳聞都係垃圾，事實係球會依然好信任我。」

文仙尼黑到爆，另邊廂嘅鶴臣就開始轉運，利物浦靠謝拉特下半場連入3球，反勝有拿維斯先開紀錄嘅拿玻里，謝拉特更追平雲尼斯達萊為曼聯攻入38球嘅歐洲賽入球紀錄，暫時英超球員之紀錄中，只得亨利為阿仙奴攻入嘅42球多過佢哋。賽後鶴臣用「完美」嚟形容謝拉特表現，仲話希望佢喺周日幫紅軍砌低車路士達成4連勝。