萬人迷化身鐵騎士 碧咸揸53萬電單車遊街

尋日喺洛杉磯市中心突然傳出一陣尖叫聲，原來係碧咸揸住新買架限量版電單車飛馳。碧咸自搬往洛杉磯居住後開始鍾意揸電單車，尋日佢仲話已經叫埋老婆去學車，希望日後夫唱婦隨。

雖然較早前有傳李斯特城想搵碧咸返英國踢波，但佢公開回應指自己會繼續效忠銀河，可見佢依家已經一心決定留喺洛杉磯生活。近排佢更入鄉隨俗，學啲荷里活明星買番架電單車威吓，最近就買咗架同湯告魯斯同款嘅限量版F131 Hellcat Combat，尋日萬人迷揸住呢架價值43,000鎊（約53萬港元）嘅車喺市中心飛馳，即時令街上少女神魂顛倒。

叫埋老婆一齊學

雖然近期有指碧咸婚嘅姻生活出現危機，但佢尋日就否認傳聞，仲話自己幫維多利亞安排咗一套電單車課程，希望可以令老婆都一齊參與呢項玩意。其實佢喺今年初已經表明想喺洛杉磯長住：「我3個小朋友都喺呢度讀書，生活過得非常開心，短期內都唔會離開。」碧咸日前仲接受一間西班牙電視台訪問時，預測皇馬今季將會擊敗巴塞成為西甲冠軍。