本文重點
馬斯真蘭奴嘅離隊新聞傳足成個夏天，佢嘅去向尋晚又有新進展！據西班牙《馬卡報》報道，雖然國米表示對馬斯真蘭奴失去興趣，但巴塞就繼續死纏爛打，消息指利物浦初步同意放人，並且為佢標價2,600萬歐元（約2.6億港元）。
國米表明冇興趣
據利物浦領隊鶴臣所講，國米會長莫拉堤已經知會紅軍，表明冇興趣羅致馬斯真蘭奴，所以現階段只有巴塞同利記討價還價。西班牙傳媒指出巴塞原先提出以1,500萬歐元（約1.5億港元）收購，基於出場次數同球隊成績等再加500萬歐元，但已經遭利記方面拒絕。
消息指紅軍企到咁硬皆因嫌巴塞出手太低，西班牙電台《RAC1》同《馬卡報》尋晚報道，話利記查實對呢單轉會抱開放態度，但先決條件係要巴塞畀2,600萬歐元轉會費先有得傾。