本文重點
西班牙《世界報育報》爆料，皇家馬德里教頭莫連奴曾經喺1個月前，密會球會高層布達堅奴，希望對方支持佢收購瑞典射手伊巴謙莫域，加上佢喺羅致奧斯爾後講過，需要個正宗9號射手，據聞皇馬已正式展開斟介，同時開出3,500萬歐元（約3.5億港元）轉會費，希望將伊巴謙莫域撬到巴拿貝球場。
里昂加入爭奪羅賓奴
根據傳媒估計，莫連奴收購目標包括杜奧巴、艾迪巴約、洛蘭迪、盧卡古同馬里奧高美斯，但其實佢最想要嘅係伊巴謙莫域至真。據講，莫連奴親口講過「我想要個9號」，言下之意，即係信唔過希古恩同賓施馬，皇馬為咗喺最短時間內重奪錦標，決定出動3,500萬歐元轉會費，幫佢組成最強「銀河艦隊」。
《馬卡報》又指皇馬中場德倫特將會被賣到賓菲加，交易可能今日完成，至於同皇馬一樣，今季瘋狂掃貨嘅曼城，就會將羅賓奴踢走，而且已接受比錫達斯嘅2,500萬鎊出價，不過《曼徹斯特晚報》就話，上季提出過借用羅賓奴嘅里昂，打算同比錫達斯拗手瓜，希望截胡成功搶人，睇怕佢離隊已成定局。