黃蜂為慳錢，近年送走贊特拿等球星，又炒教練史葛，令基斯保羅好不滿，睇唔到未來有希望，所以傳佢打算向黃蜂提出離隊，首選去紐約人，次選係魔術。據報黃蜂將喺下周一同「CP3」開會，一旦未能說服佢留低，就會將佢交易。

據內幕人士爆料，基斯保羅想去紐約人，原因係希望同史杜迪米亞，以及與金塊仲有1年約嘅安東尼合組三巨頭，擊敗由占士、韋迪同保殊組成嘅熱火「Big3」。論星味，紐約人「Big3」可能唔及熱火，但睇職業生涯平均數據（見附表），其實兩邊球員唔差得遠，特別係基斯保羅助攻力強，安東尼同史杜迪米亞喺佢輔助下威力隨時倍增，未必唔夠熱火三巨頭鬥！「CP3」老友勒邦占士，亦透過Twitter暗示支持佢離隊：「祝我老友CP3好運，去做對自己同家庭最有利嘅事！」

阿羅約自由身唔走人

成為眾矢之的嘅熱火「Big3」能否成功，依家言之尚早，但講到商品銷路，就贏晒對手。據NBA官方公布，熱火商品相當暢銷，其中「Big3」統統打入球衣銷售頭5位，季票銷情亦理想，專家估計「Big3」熱潮將為佛羅里達州南部帶嚟10億美元（約78億港元）嘅經濟收益，難怪早前約滿成為自由身嘅控衞阿羅約，尋日亦決定重返熱火啦！