本文重點
恭喜晒安東尼！皆因呢位金塊球星尋日搶晒近排轉會球星嘅鋒頭，買咗接近20萬美元鑽石迎娶美國著名藝人拉娜（LaLa Vazquez），結束7年愛情長跑。據報婚禮超過300人出席，不乏體壇同娛樂圈巨星，其中「新聞人物」勒邦占士亦有出席，不過戴上黑超扮cool嘅「大帝」對記者十問九唔應。
現年25歲嘅安東尼早喺18歲已經同前美國MTV VJ、大佢5年嘅LaLa拍拖，兩人04年訂婚，尋日終於喺紐約曼哈頓舉行婚禮，雙方由大家3歲嘅仔Kiyan引領入教堂。
被問「點解唔揀紐約人」
據知情人士透露，婚禮超過300人出席，當中不乏全美體壇同音樂界人士，好似網球「一姐」S威廉斯、Kim Kardashian同Justin Timberlake等，另外啱啱轉會熱火嘅勒邦占士亦偕女友出席，但佢一落車就一支箭衝入會場，避開「點解唔揀紐約人」等尷尬問題。
婚禮場地布置主要以紅色為主，由美國著名作家Michael Eric Dyson主持。消息指安東尼為咗今次婚禮總共買咗10卡半鑽石，總值接近20萬美元（約155萬港元）。不過安東尼絕對賺得番，事關佢已經將婚禮嘅獨家片段賣畀VH1電視台，嚟緊將製成真人騷。
大把綠葉等去熱火
至於轉會消息方面，繼斟湖人球星費沙後，魔術小前鋒班尼斯尋日率先表態將會加盟熱火，據報騎士中鋒伊高斯卡斯亦有意跟隨，預計未來將有更多「綠葉」為爭冠軍而選擇加盟熱火。