本文重點
美職聽朝有場好戲碼，上屆總冠軍皇家鹽湖城會喺主場恭候新英倫革命，鹽湖城今仗有兩大主將芬特尼同碧卡文回歸，戰鬥力即時大增，加上「魔鬼主場」嘅威力要擊退革命冇難度，嫌主W熱可博2.45倍「讓球主勝」。（開賽時間：周六早上10:00）
鹽湖城近3場聯賽有2場失分，似有回落迹象，好在佢哋主場出擊一向夠惡，齋計常規賽已經保持跨季17場不敗。況且王牌射手芬特尼已經歸隊，拍住喺美職超晒班嘅射手沙保里奧攻堅，鋒力有一定保證，而且中場碧卡文亦有望克服傷患披甲，人腳相當完整。
奧雷布洛瑞典盃未必搏
對家革命今季有「助攻王」拉斯頓離隊，表現即刻大插水，近10場聯賽只係贏過1場，今季6場作客輸咗5場就知佢哋客場出擊冇料，上季造訪鹽湖城更加慘敗0:6收場，今鋪再輸鑊勁唔出奇。
今晚仲有場瑞盃16強，奧雷布洛暫時喺瑞超名列前茅，但兵源唔算充足，會方講明寧願專心踢好聯賽，今晚造訪甲組嘅索特拿唔排除出副選，寧博2.1倍「讓球主勝」。（開賽時間：周六凌晨0:30）