一直有傷嘅高比拜仁，原本預計會喺總決賽後接受手術，不過一向當足球係「第二運動」嘅佢，早前接受訪問時就話一完總決賽後必定會捕喺電視機前睇世盃，仲揚言會帶晒成家人去南非睇波，好多人都以為佢講笑，點知「小飛俠」尋日喺勝利巡遊後接受訪問時，就話呢個計劃冇變過，嚟緊會出發去南非睇世界盃。

巴塞Fans最愛阿根廷

好多人都以為高比拜仁係美國人，睇世盃一定撐祖國，或者可能撐成日入場幫佢打氣嘅碧咸所代表嘅英格蘭，但原來高比拜仁係巴塞隆拿粉絲，最鍾意係美斯，所以去到南非會捧阿根廷：「世界盃我肯定會睇，我好鍾意美斯，當然巴塞球員我都會留意。」

巡遊使1,560萬勁縮皮

講番尋日嘅巡遊，雖然湖人今年大幅縮皮，只係使咗200萬美金（約1,560萬港元），取消部分表演節目，教練積遜又因為一早book咗睇醫生缺席，好彩仲有「魔術手」莊遜同「天勾」渣巴撐場，同湖人一班球員坐咗喺一架18個轆嘅開篷貨櫃車上，沿途仍吸引200萬人揮手尖叫慶祝，當中好多球迷都着代表湖人嘅紫金色衫褲支持球隊第16次奪標，事後高比揚言球隊已為下季做好準備，為「三連霸」進發，可惜有啲球迷仲唔生性，至少有9人被捕，加埋之前班搞事者已突破50人，可謂湖人今次奪標一大污點。