拉舒華萊士同柏堅斯喺今屆季後賽已各累積6次「T-Foul」，根據賽例，如果達到7次「T-Foul」，就會自動停賽1場，賽前外間都擔心兩人因為驚受罰，今場會就住就住，不過佢哋已堅決表示唔會。

拜林保證落場搏殺

柏堅斯話真係冇諗過停賽：「當比賽開始，我一定會全力以赴。我會繼續貼身mark對手，但會打得醒目啲，目標係贏波。」至於一向囂張嘅拉舒華萊士更唔當一回事：「如果球證想罰我咪罰我囉！」

本來呢個處境對湖人係一個優勢，不過教練積遜賽前就揚言唔會乘人之危：「我知球隊依家可以挑釁佢哋令佢哋停賽，但我唔想隊波做埋啲咁下流嘅嘢。」可能好心真係有好報，近期右膝腫晒嘅湖人中鋒拜林啱啱成功進行抽膝積水治療，揚言100%可以上陣，但上陣幾多時間，就要睇膝頭哥頂得順幾耐。