NBA一向都有好多荷里活巨星「粉絲」，當中支持塞爾特人同湖人特別多，好似奧斯卡金像影帝積尼高遜就係湖人忠實球迷，至於麥迪文同賓艾弗力就係塞爾特人支持者。

邊隊輸咗要着對方波衫

隨住兩隊最近喺總決賽碰頭，洛杉磯市長維拉萊戈沙就向波士頓市長文連奴提出友好打賭：「如果塞爾特人贏總冠軍，我哋會派積尼高遜着『綠軍』波衫，兼去波士頓拍一套商業片，介紹當地地標老北教堂同其他名勝。相反，如果湖人贏波，我哋希望塞爾特人派麥迪文同賓艾弗力着湖人波衫擔任演講者，公開讚揚洛杉磯無論天氣、沙灘同食物都係一流。」兩地高級警察亦打賭，如果敵方球隊奪標，就會去對方城市同當地警察輪班巡邏。

另外，美國「夢幻隊」日前宣布湖人球星高比拜仁已通知佢哋，將喺總決賽後接受右膝手術，唔會打嚟緊喺土耳其舉行嘅世錦賽，大大影響美國爭標嘅機會。