被視為爭標熱門之一嘅金塊，近日收到壞消息，就係正與喉及頸癌對抗嘅教練卡爾，正式宣布喺今季常規賽同季後賽首輪都復出無望。
金塊入決賽或扶病領軍
近兩個月全力對抗癌魔嘅卡爾，經過36次放射性治療後，將會喺周三接受最後一次化療。同卡爾有個5歲囡囡嘅雲迪拉透露，由於卡爾近期足足瘦咗25磅，連講嘢都有困難，嚟緊3至6個月可能只可以進食流質食物，究竟幾時先可以復出領軍，真係好難講。
雲迪拉表示：「帶隊打季後賽？要視乎佢身體情況。邊個知道到時會點吖？就連佢自己都唔知，唯一肯定嘅，係如果金塊真係殺入最後階段，佢一定會盡量親自帶隊。」卡爾對上一次領軍係喺上月16日，當時金塊係對巫師。