倒戈戰未必下下氣氛火爆，有時都可以好Warm！例如帝王前鋒蘭特利尋日倒戈火箭，就受到前東家球迷起身鼓掌歡迎，但佢無忘記本分，個人取得22分，助帝王以84:81擊敗火箭！
火箭早前為咗要送走麥基迪，不惜忍痛將蘭特利列作交易條件之一送到帝王，佢尋日隨隊造訪火箭，賽前就不諱言有啲緊張！
火箭球迷起身鼓掌
不過，事實證明蘭特利只係過慮，因為賽前介紹兩軍球員時，一提到蘭特利嘅名，全場火箭球迷起身鼓掌，仲不斷高呼：「蘭特利！蘭特利！」甚至當比賽去到第一次暫停嘅時候，火箭仲喺場內播出蘭特利嘅精華片段，就知大家都仲係好掛住佢！
講番比賽，蘭特利今戰唔止8個罰球全中射入22分，另外再貢獻10個籃板，鋒芒蓋過代表火箭倒戈帝王、但只得14分嘅奇雲馬田，最後帝王亦以84:81贏波，問題係佢哋今季不設防，聽朝作客小牛應該係得分大戰，玩大盤好過下盤！